УИХ-ын гишүүн асан Д.Дондогийг олон удаагийн үйлдлээр бусдын эд хөрөнгийг залилсан хэмээн 2008 оноос шалгаж байсан ч УИХ-ын гишүүний бүрэн эрхийг түтгэлзүүлээгүй хэргийг түтгэлзүүлээд байсан.
Харин 2012 оны сонгуульд сонгогдоогүй учир түүний хэргийг сэргээн шалгаж, энэ сард шүүхэд шилжүүлэхээр болсон юм. Учир нь мөрдөн байцаалтын явцад тэрээр өөрийн шадар туслахаар ажиллаж байсан Г.Сайнбаяраар дамжуулан “Меридан” гэх компаниас орон сууцны барилга барих зөвшөөрөл гаргуулж өгнө гээд 242 мянга ам.доллар, 400 сая төгрөг залилан авч, уг мөнгийг өөрийн сонгуулийн сурталчилгаандаа зарцуулсан нь тогтоогдсон.
Тиймээс онц их хэмжээний мөнгийг бусадтай бүлэглэн залилж авсан хэмээн Эрүүгийн хуулийн 148.4-т зааснаар эрүүгийн хэрэг үүсгэн шалгаж байгаа юм. Түүнээс гадна уг хэрэгт нийт 10 гаруй хүнийг шалгаж байгаа билээ.
Харин өнгөрсөн сард АТГ-аас яллах дүгнэлт үйлдүүлэхээр Нийслэлийн прокурорын газарт шилжүүлэн, одоо Нийслэлийн прокурорын газраас хянаж байгаа юм. Хэргийн талаар Нийслэлийн прокурорын нэгдүгээр орлогч Ё.Сагсайгаас тодруулахад “УИХ-ын гишүүн асан Д.Дондог нарын хэргийг шүүхэд шилжүүлэх болоогүй байна. Учир нь олон холбогдогчтой учир нэмж тодруулах зүйл их байна” гэв.
Б.Чимэг