Сонгинохайрхан дүүргийн Засаг дарга Ц.Болдод холбогдох хэргийг Нийслэлийн прокурорын газраас яллах дүгнэлт үйлдэж, ирэх долоо хоногт шүүхэд шилжүүлэхээр болжээ. Өмнө нь түүний хэргийг Баянзүрх дүүргийн шүүхээр хэлэлцэж, мөрдөн байцаалт дутуу хэмээн УМБГ-т буцааж байсан билээ.
Түүнийг Нийслэлийн хот тохижилтын газрын даргаар ажиллаж байхдаа Нийслэлийн захирагчийн албаны орчны бохирдол хог хаягдалтын менежментийн хэлтсийн дарга асан Н.Дэлгэрбаяр, Хот тохижилтийн газрын нягтлан бодогчоор ажиллаж байсан Н.Баяраа нартай урьдчилан тохиролцож бүлэглэж, албан тушаалаа урвуулан ашиглаж, байгууллагад онц их хэмжээний хохирол учруулсан мөн бүлэглэн төсвийн хөрөнгийг завшиж, үрэгдүүлсэн хэмээн буруутгаж байгаа юм.
Ц.Болд нь Улаанбаатар хотын өвлийн улиралд цас хайлуулах химийн бодисыг гаднаас гэрээгээр нийлүүлэх нэрийн дор их хэмжээний хөрөнгө төсвийн хөрөнгөөс гаргаж, тус хүмүүстэй хамтарч хуурамч баримт бүрдүүлж завшиж үрэгдүүлсэн байна. Тэдний үйлдлийн улмаас төрийн байгууллага, төсвийн хөрөнгөд 88 сая орчим төгрөгийн хохирол учирсан аж. Мөн 61 сая орчим төгрөгийн эд хөрөнгийг бусадтай бүлэглэн завшиж, үрэгдүүлсэн байна. Тиймээс тэдэнд Эрүүгийн хуулийн тусгай ангийн 150.3-т зааснаар яллах дүгнэлт үйлдэж, шүүхэд шилжүүлэхээр болоод байгаа юм байна.
Б.Чимэг